top of page

|| யதோ வாசோ நிவர்தந்தே || - 20


ஆசிரியரின் முன்னுரை - பி ராதா கிருஷ்ண மூர்த்தி (பி.ஆர்.கே)


ஸ்ரீ சுவாமி பூர்னானந்தாவின் ஆசீர்வாதத்துடன், நாங்கள் எங்கள் தமிழக சுற்றுப்பயணத்தை வெற்றிகரமாக முடித்துவிட்டு, குருமாதா மற்றும் ஸ்ரீ ராக்காடி பாபாவின் பாதுகைகளுடன் ஸ்ரீசைலம் திரும்பினோம். சுவாமிஜிக்கு வாக்குறுதியளித்தபடி ஹடகேஸ்வரத்தை அடைந்த பிறகு, நான் குருமாதாவை எங்கள் வீட்டிற்கு அழைத்து சென்றேன். பாபாவின் பாதுகைகளையும் என்னுடன் வைத்திருக்குமாறு சுவாமிஜி என்னிடம் கேட்டதால், குருபாதுகைகளை எங்கள் வீட்டிற்கும் எடுத்து செல்லும் பாக்கியம் எனக்கு கிடைத்தது .


 

குருமாதா எங்களுடன் சிரமமின்றி ஒன்றிணைந்து எங்கள் குடும்பத்தில் ஒருவராக ஆனார். தனது வேலைகளை தானாகவே செய்வதை தவிர, அனைவருக்கும் சமைப்பதிலும் உணவளிப்பதிலும் மிகுந்த மகிழ்ச்சி அடைந்தார் . இருப்பினும், நாங்கள் முதலில் ஸ்ரீசைலத்திற்கு அழைத்து வந்தபோது குருமதாவுக்கு உடல்நிலை சரியில்லை. அவர்கள் தூங்கமாட்டார்கள் . எப்போதும் ஸ்ரீ துர்கா சப்தசதி அல்லது கீர்த்தனங்களைப் பாடுவதை நாம் காணலாம். அவர்களுடைய உணவு பழக்கம் மற்றும் மொழி பற்றி எங்களுக்குத் தெரியாததால், அவர்களுடைய விருப்பங்களையும் தேவைகளையும் புரிந்துகொள்வது கடினமாக இருந்தது. அவர்களுடைய மோசமான கண் பார்வை மற்றும் தூக்கமின்மை என்னை மிகவும் பாதித்தது. சுவாமிஜி அவர்களது ஆரோக்கியத்தின் முன்னேற்றத்திற்கு ஒரு தீர்வை காண முடியும் என்பதை நான் அறிவேன். ஆனால் நானே குருமாதாவை கவனித்துக்கொள்வதற்கான வார்த்தையை நான் கொடுத்ததால், சுவாமிஜியிடம் கேட்பதற்கு மிகவும் தயங்கி கொண்டு மெதுவாக ஹடகேஸ்வரத்தை அடைந்தேன்.


நான் ஹடகேஸ்வரத்தை அடைந்தபோது சுவாமிஜி ஆசிரமத்தில் தனியாக இருந்தார். குருமாதாவின் உடல்நிலை குறித்து சுவாமிஜியை எப்படிக் கேட்பது என்று யோசித்தேன், நான் மெதுவாக அவரை அணுகினேன். இதற்கிடையில், சுவாமிஜி என்னை தாயார் ஏதாவது தொந்தரவு செய்கிறாரா என்று கேட்டார். நான் அமைதியாக சொன்னேன், “என் அம்மா உடல்நிலை சரி இல்லை சுவாமிஜி. அவரது உடல்நிலையை சரிசெய்வதற்கு ஒரு தீர்வை பரிந்துரைக்க முடியுமா? “என்றேன் . நான் குருமாதாவை குறித்து கேட்கிறேன் , என் அம்மாவிற்காக அல்ல என்பதை சுவாமிஜி அறிந்திருந்தார் என்று சொல்லத் தேவையில்லை. இனிமையான, ஒரு சிறிய புன்னகையுடன் சுவாமிஜி, “இதற்கு ஒரு தீர்வு இருக்கிறது. நான் உன்னிடம் சொல்கிறேன்"என்றார்.


குருமாதாவின் ஆரோக்கியம் , சீரடைவதற்கு ஒரு கலச பூஜை செய்யப்பட வேண்டும் என்பதை சுவாமிஜி சுட்டிக்காட்டினார், மேலும் பூஜைக்கு தேவையான பொருட்களை கொண்டு வருமாறு எனக்கு கூறினார் . மாலைக்குள், பூஜைக்கு தேவையான ஒரு மண் பானை, சில மூலிகைகள் மற்றும் பிற பொருட்களுடன் நான் மீண்டும் சுவாமிஜியிடம் சென்றேன். அந்தி வேளையில், சுவாமிஜி கலச பூஜையை தொடங்கினார். அதுவரை நான் கலச பூஜை பற்றி கேள்விப்பட்டதே இல்லை. சுவாமிஜி இரவு முழுவதும் பூஜை செய்தார் . விடியற்காலை வரை பூஜையை தொடர்ந்தார். சூரிய உதயத்திற்கு பிறகு, சுவாமிஜி என் அம்மாவை அழைத்து வர சொன்னார். நான் உடனே ப்ராஜெக்ட் காலனிக்கு சென்று, குளித்துவிட்டு, ஜீப்பில் குருமாதாவை ஹடகேஸ்வரத்திற்கு அழைத்து வந்தேன்.


சுவாமிஜி கலச நீரில் குருமாதாவிற்கு அபிஷேகம் செய்தார். அன்று சுவாமிஜியே குருமாதாவிற்கு மதிய உணவு சமைத்து உணவளித்தார். குருமதாவின் உடல்நிலை மேம்படும் என்று எனக்கு உறுதியளித்த சுவாமிஜி, என்னுடன் அவர்களை எங்கள் வீட்டிற்கு திருப்பி அனுப்பினார். அந்த நாளுக்கு பிறகு, குருமதாவின் உடல்நிலை சீராக தொடங்கியது. மிக நீண்ட காலம் கழித்து, அன்றிரவு அவர்கள் அமைதியான தூங்கினார்கள் .


சுவாமிஜி தமிழ்நாட்டில் முன்னறிவித்தபடி, எனக்கு வேலையில் பதவி உயர்வு வழங்கப்பட்டது. என்னை ஊக்குவிக்க மாநில அரசுக்கு வேறு எந்த வாய்ப்பும் இல்லை. போச்சம்பாடுவில் மத்திய அரசின் கீழ் வரவிருக்கும் திட்டம் ஒன்று இருந்தது. அந்த திட்டத்திற்கான பிரதேச மேற்பார்வையாளர் பதவி எனக்கு வழங்கப்பட்டது. என் பதவி உயர்வு பெறுவது குறித்து சுவாமிஜி சொன்ன வார்த்தைகள் இந்த வழியில் நிறைவேறின. ஸ்ரீசைலம் மற்றும் சுவாமிஜியை விட்டு செல்ல விருப்பமில்லாமல், நான் அந்த வாய்ப்பை நிராகரித்தேன். இருப்பினும், எனது சகாக்களும் நண்பர்களும் எனக்கு ஒரு நல்ல எதிர்காலம் கிடைக்கும் என்று கூறி சலுகையை எடுக்க என்னை வற்புறுத்த முயன்றனர். ஆனால் என்னால் உறுதியாக நம்ப முடியவில்லை, பதவி உயர்வு நிராகரிக்கப்பட்டது. எனக்குத் தெரியாமல், எனது சகாக்களும் நண்பர்களும் சுவாமிஜிக்குச் சென்று, பதவி உயர்வு மற்றும் அதை எடுத்து கொள்ளாததற்காண எனது பிடிவாதம் குறித்து அவருக்கு விளக்கினர்.


இதையெல்லாம் நான் அறியாததால், எனது வழக்கமான பழக்கத்தை பின்பற்றி, அன்று மாலை சுவாமிஜியின் தரிசனத்திற்காக வருகை தந்தேன். சுவாமிஜி கோபமாக தோன்றினார், நான் பதற்றத்துடன் அவரை அணுகினேன். சுவாமிஜி என்னிடம், “இலக்கின்றி நேரத்தை செலவிடுவதற்கு பதிலாக, நீ ஏன் சிறிது நேரம் ஜபம் செய்யக்கூடாது? “என்றார் . சுவாமிஜி சொன்னவுடனேயே, நான் அருகிலுள்ள குளத்தில் விரைவாக குளித்துவிட்டு, என்னைச் சுற்றி ஒரு துண்டைக் கட்டிக்கொண்டு, பஞ்சாங்கினி ஹோமத்துக்காக நாங்கள் நிறுவியிருந்த தாழ்வாரத்தில் அமர்ந்தேன். அமாவாசை நாளாக இருந்ததால் , முழு காடும் சூரிய அஸ்தமனத்திற்கு பிறகு இருளில் மூழ்கின. ஏதாவது காட்டு விலங்கு என்னைத் தாக்கக்கூடும் என்று பயந்து அந்த மண்டபத்தில் அமர்ந்தேன். தாக்கப்படுவேன் என்ற எனது கவலை மட்டுமில்லாமல் , ஜபத்தை தொடங்க எந்த மந்திரமும் எனக்கு தெரிய வில்லை . நான் கண்களை இறுக்கமாக மூடிக்கொண்டு ‘குரு பிரம்மா ..’ ஸ்லோகத்தை சத்தமாக கத்தினேன். என் அலறல் விலங்குகளை என்னிடமிருந்து விலக்கி வைக்கும் என்று நான் நம்பினேன். நான் ஸ்லோகம் முழக்கமிடுவதை முடித்த நேரத்தில், சுவாமிஜி எழுந்து நின்று என்னை நோக்கி நடந்து வந்தார்கள் . நான் கண்களைத் திறந்து சுவாமிஜியை பார்த்துக் கொண்டே இருந்தேன்.


அப்போது சுவாமிஜி என்னிடம், “நீ இப்போது என்ன சொன்னாய் ? “என்றார் .


நான் சொன்னேன், “சுவாமிஜி நான் ஒரு ஸ்லோகம் சொன்னேன் ” என்று கூறி , ‘குரு பிரம்மா ..’ ஸ்லோகத்தை மீண்டும் முழக்கமிட்டேன்.


முழுமையான அப்பாவித்தனத்துடன், சுவாமிஜி, “ஸ்லோகத்தின் பொருள் என்ன?” என்று கேட்டார்.


ஒரு அறிஞரைப் போல மிகுந்த நம்பிக்கையுடன், நான் சுவாமிஜிக்கு அர்த்தத்தை விளக்க ஆரம்பித்தேன்.


நான் சொன்னேன், “குரு தான்பிரம்மா, குரு தான் விஷ்ணு, குரு தான் மஹேஸ்வரர் என்று பொருள்”.


சுவாமிஜி உடனே கேட்டார், “அப்போது யார் இந்த பரபிரமம்?”.


சிறிது நேரம் யோசித்த பிறகு, நான் பதிலளித்தேன், “என் குழந்தை பருவத்தில், என் தந்தை பகவதத்திலிருந்து ஒரு வசனத்தை என்னிடம் கூறினார். வசனம் பரபிரம்மத்தைப் பற்றி பேசுகிறது ”.


என்று கூறி நான் வசனத்தை கூறினேன் ,


“இந்து கலாதான் துலேதான சந்தேகமு வலது ,சக்ரி சர்வோபகாத்தும் தேந்தேன்து வேதிகி சூசின அந்தண்டே கலடு “

பரபிரஹ்மம் ஒரே இடத்தில் மட்டுமே இருக்கிறார் என்பதில் சந்தேகம் இருக்கக்கூடாது என்பதே இதன் பொருள். இந்த பிரபஞ்சத்தில் ஒவ்வொரு இடத்திலும், ஒவ்வொரு விஷயத்திலும், ஒவ்வொரு உயிரினத்திலும் பரப்ரம்மம் இருக்கிறார்.இந்த ஸ்லோகம் குரு என்பவர் பரப்ரம்மத்தின் ஸ்வரூபம், என்று சொல்கிறது சுவாமிஜி ”என்றேன் .


அதற்கு சுவாமிஜி என்னிடம் கேள்வி எழுப்பினார்,


“ஓ! எனவே, ஸ்ரீசைலத்தில் இருக்கும் உன் குரு, ஒவ்வொரு இடத்திலும், உயிரிலும் மற்றும் வடிவத்தில் இருப்பவர் . அவர் போச்சம்பாடுவிலும் இருப்பார் அல்லவா? ”.

சுவாமிஜியின் கேள்விக்கு எவ்வாறு பதிலளிக்க வேண்டும் என்று எனக்குத் தெரியவில்லை. அவரிடமிருந்து விலகிவிடுவேன் என்ற பயத்தோடு நான் பதவி உயர்வு நிராகரித்தேன் என்பதை அறிந்த சுவாமிஜி, குரு எங்கும் நிறைந்தவர், எல்லா இடத்திலும் இருப்பவர் என்பதை என்னை ஏமாற்றி ஏற்று கொள்ள வைத்து விட்டார் .


நான் எதுவும் சொல்வதற்கு முன்பு, சுவாமிஜி கடுமையாக, “வெளியேறு!” என்றார். நான் உடனே எழுந்து நின்று ஹடகேஸ்வர சுவாமி கோவிலுக்கு ஓடினேன். நான் பதவி உயர்வு எடுக்காவிட்டால் சுவாமிஜி என்னை விடமாட்டார் என்று எனக்கு தோன்றியது . அடுத்த நாள், நான் மத்திய அரசாங்கத்தில் நியமிக்கப்படுவதை ஏற்றுக்கொண்டேன்.


ஏப்ரல் 1969 இல், நான் சுவாமிஜியின் முதல் தரிசனம் செய்தேன், நேரம் அவரது சன்னிதியில் பறந்தது. அந்தக் காலம் வரை ஒரு குருவைப் பற்றியும் அவரின் முக்கியத்துவத்தைப் பற்றியும் தெரியாமல் இருந்தும் , என் பெற்றோரால் எனக்குக் கிடைத்த நல்ல அதிர்ஷ்டத்தினாலோ அல்லது எனது கடந்த கால வாழ்க்கையின் புண்ணியதாலோ , அந்த ஆண்டில் நான் சுவாமிஜியின் சன்னிதியில் இருந்ததின் மூலம் சில விலைமதிப்பற்ற அனுபவங்களையும் அறிவையும் பெற்றேன். ஆண்டு முழுவதும் பல பெரிய மகான்களின் தரிசனம் கிடைத்ததில் நான் ஆசீர்வதிக்கப்பட்டேன். சுவாமிஜிக்கு சேவை செய்ததின் மூலம், எனக்கு பதவி உயர்வு கிடைக்கப்பெற்றது மட்டுமல்லாமல், சுவாமிஜி எனது தந்தையை முக்தி அடைய ஆசீர்வதித்தார். குருமாதா மற்றும் குருபாதுகையின் வருகையுடன் தொடங்கிய 1970 ஆம் ஆண்டு, இப்போது என்னை ஸ்ரீசைலத்திலிருந்து விலக்கி போச்சம்பாட்டிற்கு நகர்த்தி கொண்டிருந்தது.


ஸ்ரீ சுவாமிஜியுடன் பி ராதா கிருஷ்ண மூர்த்தி காரு
 

தொடரும்

62 views0 comments

Hozzászólások


bottom of page